في الظل .. أنا في الظل
وانا الأوهج .. أنا الأبهج..
ولكن يقتضي المنهج..
أبقى أنا في الظل..
أنا لهمومه المخرج..
وانا إن ضاق بي يُفرج..
ولكن لجل ما يُحرَج..
ببقى أنا في الظل..
أنا الشوق الذي هزّه..
وانا المضمون أي حزّه..
وانا اللي يلقى بي عزّه..
والقى معاه الذل..
برغم اني أنا الأوهج..
برغم اني أنا الأبهج..
أبى المنهج..
إلّا أكون
وحدي حبيس الظل..
دايم أنا في الظل..!
في الظل
———
مقدر أقول انّه ظلمني
لكن ظلمني..
مقدر اقول لا ما حرمني
إلّا حرمني..
صحيح كنت ادري بظروفه..
ولا تعمّد لي الحسوفه..
لكن انا اللي شلت همّه..
واصبحت ل حْمولهْ كتوفه..
وشلون ادل .. دربٍ يوصلني لإنصافي..
وين العدل.. باني اكون الضافي الخافي..
وانا لعلّاته دوا .. ولا بي الجافي
ولا لقى فيني سوى.. الصافي الوافي
أنا مجاديفه في يمّه..
وانا بعد المُهمَل الكافي..
برغم اني أنا الأوهج..
برغم اني أنا الأبهج..
أبى المنهج ..
إلّا أكون ..
وحدي حبيس الظل..
دايم أنا في الظل..
في الظل..
————
ياسيدي مليت ليلك..
خذني ولو مرة لنهارك..
ياسيدي تكفى دخيلك
سرّي يبي موته جهارك..
مليت سرداب المشاعر ..
ومليت اكون الهام شاعر..
ومليت من كثر التفاتك
قبل تهمس لي شفاتك
مليت انا الحب الكبير
اللي أمانه في الظلام
ياسيدي ماهو كثير
تمسك يدي وسط الزحام..
مليت أنا الذل..
وزنزانة الظل..
لأنّي دايم الأوهج..
لأني دايم الأبهج..
وانا المنهج
أرفض أكون..
وحدي حبيس الظل ..
وحدي أنا في الظل..
في الظل!
