أنا مش كداب
وقت اما رميت الدنيا ف ضهري
وجيت عندك وقفلتي الباب
كان قصدي ساعتها نلِّم دموعنا ونتّبسًِّم
مش قصدي عتاب
انا جيتلك وانا كل ما فيا
بيشوف انك كل ما ليا
ومشيت بمافيش
وحياة الحلو اللي مابيننا
لو كان فيه شيء حلو مابيننا
ماتكدّبينيش
ده انا قلبي بكل ما فيه شايفك
تايه في الرعشة اللي شفايفك بتخبيها
متفائل بيكي وحاسس انك قولتيها
بستني إشارة تكون أي بداية لبكره
وبشوفها بشارة
الضحكة اللي انتي ضحكتيها
انا مش كداب
ولا جيّ اقدّم للسايب
وجع المتساب
انا جاي عشان بس اقولك بزيادة غياب
وان كان فاضل ليا محبه
لو فاضل حب ولو حبّه
اسمعي مني كلامي وحسّيه
انا مش طالب إلا وجودك
حنًِّني والنبي قلب جنودك
عينك ومشاعرك وردودك
وافتحي بابك اللي قفلتيه
انا عمري ماخدت فرص من حد
ودفعت الاتمان الكاملة
انا عمري ماقولت ياريت لو كان
نرجع لزمان
ولا فكرت ف ايه هيكون
من بعد ماكان
بس الموضوع المره دي
يستاهل اجرب من تاني
انا مش عاوز اقدم أسباب
انا جي أقول
انا مش كداب
ف غيابك مهما مشيت ورضيت
وعملت صحاب واغاني وبيت
هفضل مكسور مهما اتلميت
هفضل شارد مهما اتونِّست
ريحتك روحي
بمشي ف أوقات والليل واسع
والناس نايمين والخوف لاسع
بتخيل ايدك مسكاني
وبشوف قفلة عينك ف الضحك
زي ماكنت بشوفها الأول
أتمنى الحاصل ده يطوّل
تتحرك مزيكا بسيطه
شبه الفستان اللي عليكي
اقفل على ايدي بلا ايديكي
يوجعني حنيني ويخنقني
دي اول مرة وعهد الله
اطلب من حد يصدقني
لو كنت اذيتك
انا اسف
اسف على قد مايرضيكي
وان عشت حياتي بقدم أسفي ومايكّفيش
هافضل اقدمه
على قد ما ربنا يديني ف الدنيا واعيش
وان كنتي اذيتي انا مسامح
انا جايب بكره اتفاوض بيه
على حصة وجعك في امبارح
باتخطى سنين ضاعت منّا
من غير ما ادخل حسبة تفاحتك والجنه
وبشوف الصح اللي انا ممكن أعمله دلوقت
اني أوقّف ماراثون الوقت
واجي لحدك واطلب فرصه
فرصه ياست الستات تاني
ليا وليكي
ربنا له حكمه يجمّعنا
وعشان كده كل ما نبعد بلاقيكي
كل مانتخاصم نتصالح
لما توافقي
هيبيع جواهرجي ف يوم خاتم
هيجيب مأذون عشا لولاده
هيزيد مشروب وهيبقى اتنين
ونضيف للدنيا اتنين عشاق
وان موافقتيش
فيه رزق هيبقى انتهى مقطوع
وانتي مترضيش تقطعي ارزاق
بزيادة العند اللي ف طبعك
بزيادة الخوف اللي متابعك
انا مش عاوزك في رهان بايخ
ولا جي ابيع سهم ف بورصه
انا جاي أقولك استاهل
اخد فرصه
صعبه عليكي ؟
فين كرمك
فين فرط ايديكي
ده انتي كريمه وقلبِك سابقك
وانا لسه حبيبك ومصمم
ياهتقبلي حالاً بيّا
ياهعيش باقي حياتي بخانقك
وهخانق كل اللي يفكّر بس يشاغلك
انا قررت ان انتي توافقي
ولغيت كل احتمالات الرفض
انتي الست اللي انا بتمنى
تغلبني التجاعيد ف وجودها
وابقى معاها
واحمي مقامها
انتي الست اللي انا مش مكسوف
انحني
او اعيّط قدامها
وانتي الانسانه اللي انا موجود
علشان تتحقق احلامها
وعشان ألحق حبل غرامها
لو تاه
أو داب
انا جي اطلب ايدك منك
يا ذنوبي اللي القلب بيستغفر
عنّها لو تاب
