ايه ياوالدي !
عامل ايه ؟
واضح ان الجو عندك أحلى جداً
من زمان ومافيش زيارة
طب تعالى انشالله حتي الشاي وتمشي
ايه ياحاج ! ده احنا عشرة عمر يعني
بعد مانت مشيت ياصاحبي عمر حضن الناس ماساعني
كلهم بيبيعوا فيا ويشتروني
الا كام واحد سايبهم طمنوني
امي واخواتي وصحابي الكام نفر
والقعاد بالليل لوحدي والسفر
بس برضه معاك بتفرق
مانت عارف
يوحش الواحد كلامك ، نظرتك طيبة سلامك
يوحش الواحد هزارك والزعيق من غير سبب
يوحش الواحد علامة جذمتك فوق العتَب
يكسر الواحد مرورك لو أتَب خلاك توطي
ثم اشوفك وانت ماشي جنب مني وجنب اخويا
ايه أمّر عليا مني يوم ما تحلف دمعتي برحمة أبويا !!
والحقيقة مافيش جديد من يوم غيابك
كل شيء لسه ف مكانه
الا شيء واحد .. أنا
لسه مش عارف افكر انت غبت لكام سنة
كنت صلب حزين ف صمتك
كنت طيب من عظمتك
خوفت منك واحترمتك
واكتشفت معاك معاني مش هاشوفها من مكاني
سبِت مطرح من مساحته مش هيملاه حد تاني
سبِت اول حد كان بيشوفني مالي
سبِت اخر كان بيروح عشاني المدرسة
سبِت صوتك وانت بتزعق ف واجبي اللي اتنسى
سبِت شاي ع النار بقاله عشر سنين
سبِت مين مش شرط اقولك مانت عارف سبت مين
أمي عال واخواتي لسه ، كل يوم تجمعنا قصة
كل يوم واحد بيخبط فيك بقصده ف الصالون
يعتذرلك تحضنه من غير وجودك
يمشي فيك فتمر فيه
كل يوم واحد يقوللي حلمت بيه
زي أول مرة شوفتك
فرع أسمر راسه فضه
قضى عمره حديد ما صدى
ثم قرر يمشي فجأة
لسه حتي الان بنكتشف المفاجأة
ثم نبكي ثم نفتكرك فنضحك
ثم ايه ! مانت عارف
ليه سايبني ياعم بحكي
وانت ساكت
مانت طول عمرك بتحكي وبسمعك
كنت لما زمان ازوّغ احكي ماعرفش اخدعك
كل ما الناظر يقوللي هات ابوك
كنت اقضي الليلة خايف من عقابك
وانت كنت ترد بابك لجل اخش واقول ونخلص
من غيابك زدنا ياما بس لما نزيد بننقص
والحقيقة انا غلطي زاد
بس لسه بنول عقابك
فيه أثر سبته ف حضورك لسه متبقي ف غيابك
والأثر هيعيش معانا
مش مكان لكن مكانة
مش جسد لكن بصيرة
شيء فهمناه واحنا حواليك حصيرة
اللي فاضل لينا احنا
واللي فاضل منا سيرة
ع العموم
ده مش رثاء
ولا شعر من باب الفراق
ده اتفاق
انك انت تعيش مابيننا
وانك انت تشيل عيالنا
وتحتمل خوفنا بدالنا
تبتسم اوقات مانفرح
نعتذر لك لما نشطح
او نخالف شكل سيرك
ده اتفاق ان احنا لسه
لم نصاحب حد غيرك
واني فاكرك
واني شاكرك ع الحكاية كلها
الكلام يبدو انتهي بس فيه ف القلب حاجة ماقولتهاش
اللي عاشها لنفسه مات واللي مات لولاده عاش
واللي شال الشيله لسه ماتنساش
رب أسرة
جدار عريض
صاحب الروح الوحيد
يلا هامشي ولينا يعني كلام أكيد
بس رد الباب عشان
لو حد قالي هات ابوك
اجي اقولك وتعاقبني
زي انا ماهعاقب ابني
لجل يفضل مستقيم
اليتيم من عاش بدونك
ف الحقيقة انا مش يتيم .
