كان فاكر اني هموت بعده
وغيابه هيتحكم فيا !
وهعيط وابكي واحن واعيش
علي امل انه هيرجع ليا
غلبان مفهمش ان انا عمري
ما اقبل علي قلبي يعيش مكسور
ولا هقبل اعاتب واتعاتب
ولا ابات وانا دمعتي في عينيا
غلبان مفهمش ان انا اصلاً
عارفة انه غشيم ومريض بيا!
بيبين انه بخير وتمام
والدنيا جميلة ووردية
عمال يدعي انه تعافي
والمضحك إنه مبطلش
يلقح علي قلبي بأغنية!
مش كنت غدرت ؟
واختارت تعيش وتسيب ايدي!
مالك عمال بتعيد وتزيد
ومفيش غير سيرتي اللي بتيجي؟
مش قولت نسيت والدنيا تمام!!
عمال تحرق بنزينك ليه!
لو كنت نسيت زي ما بتقول
مكنش زمانك بتنوح وتعيب فيا
مانا اصلي مراهنة ومش بخسر
عارفة ان غيابي معلم فيك!
بس انت نسيت انك وشين
وان المصلحة عندك نية
توب المثالية مهوش توبك
ويادوبك كان حبك غية
ف بلاش نعتب ونعيد ونزيد
ونفَتح في دفاتر خايبة
ناس قادرة تعيب ازاي فينا! وهما العايبة!
الله ينجينا ويحمينا
من شر نفوس بتشيل لينا م الغل كتير
الله لا يسوقنا لنواحيكم ولا نسمع عنكم حتي الخير
ربنا يبعد سم لسانكم
ربنا يبعد عنا غبائكم
ربنا لا يعودكوا فيوم لينا
ولا حتي نشوفكوا في عطلة سير
احنا مبنندمش لحظة
ع اللي سابنا وع اللي غاب
اللي سابنا بكرة يندم
لما هيحس الغياب
واللي جايبه الريح نسده
وسهل نقفل ألف باب
الدخول ف حياتنا تاني
فرصة مرة ف عمركوا
واللي يتعشم ف فرصة
يسأل اللي قبلكوا
واللي زعل قلبي مرة
اسألوه هيقولكوا
انه قرب وانه جرب
واما شرق كنت اغرب
واما ضحي قولت عادي
واما جالي وكان قصادي
قولتله كان اسمك ايه!
احنا لما بنقسي انسي
اننا منجيش عليه
واللي بيمس الكرامة
نهايته أقرب م السلام
طبعنا قد الغلاوة
قد ما يقل الكلام
والتجاهل فينا ميزة
أحنا مبيفرقلناش
اللي قرب واللي جرب
لو قابلته وجبت سيرتي
هو هيقولك بلاش .
اللي سابنا الله يعينه
بكرة يعرف احنا مين
بكرة يبكي علينا لما
الدنيا تعمله الكمين
يبقي وحده في وسط توهه
والشمال زي اليمين
احنا كنا ايدين تطبطب
احنا كنا كتاف تقوي
احنا كنا حجات كتيرة
كنا بعد الله نعين
اللي سابنا خسرنا لكن
احنا مبنخسرش حد
احنا وقت الشدة نقوي
واحنا وقت البُعد جد
احنا مبنمسكش بايع
غيرنا من غيرنا اللي ضايع
احنا مش بنتوه ونبكي
واللي سابنا !
ما بينا سد
احنا أجدع ناس تشوفها
مهما قاوحتنا بظروفها
بردوا ثابتين للنهاية
احنا أصل في وسط عيرة
واحنا وسط الصُحبة خيرة
مش بيدخل فينا غيرة
وصعب نبقي احنا الضحايا
مش بنقبل نبقي فترة
ناس ذكية وخلق شاطرة
صعب تأذينا بسهولة
انت سهل تعيش فاكرنا
من كلامنا ومن جِميلنا
وانت يوم ما تعوز تجيلنا
هتلقي فينا الاصل فِطرة
بس يوم ما هتتجاهلنا
ف انت اصلاً كنت فترة
احنا بنرد الجمايل
حتي لو كان بعد حين
صعب يبقي علينا حاجة
صعب يبقي علينا دين
ف اما تتجاهل هتعرف
ان وعد الحُر دين
وإننا نبيعك في ثانية
والمكان خده خلق تانية
بنبقي زي الدنيا فانية
لو فيوم تنسي احنا مين .
