موحشتنيش
والمرة دي جاية اعترف
اني بدون حبك بعيش
وانك مجرد صفحة واتقفلت خلاص
وان الحياة من غير وجودك
أحسن كتير
مبقيتش اغير
وبقيت انام من غير دموع
من غير ما قلبي ينتظر
الصلح او يوم الرجوع
وبقيت اعيش من غير عتاب
من غير عشم
من غير ما قلبي يبكي م الاهمال
كنت احتلال وعرفت اتثورج
واعيش
موحشتنيش
–
وحشتني !
انا كدابة مش نسياك
بكتب قصيدة جديدة وانا ببكي
علشان حقيقي نفسي يوم ألقاك
كدب اللي قال الوقت بينسي!
الوقت مينسيش!
مش عارفة اعيش!
مش عارفة اقول موحشتنيش!
عيني اللي لمعت وقت ما لقيتك
اكبر دليل علي اني حبيتك
وان اللي بينا كتير اوي
والبعد بينا مقاسنيش
لكن نصيبنا نفترق وهنعمل ايه؟
قولت ان بُعدك عني نساني
لكن مكانك عندي متحافظ عليه
وعشان كدة تاسع قصيدة اكتبها ليك
وفي كل مرة اكتب ” حبيبي ”
بدون ما احس ،
لو كنت ناسية بس قولي!
هكتب عشانك شعر ليه؟
–
اشتقت لك
الوقت فعلاً قاسي غيرنا
و شتتنا حبيبي بعيد
وبنينا ميت حيطة فراق
وضيع كِبرنا المواعيد
لكن مكانتك عندي
فمكانها مختلفتش
وعينيك قالتلي انك فاكرني
وعينيا قالت ان انا منسيتش
وعشان كدة بكتب عشانك
شِعر من تاني!
وجاية أقولك ان الفراق
وقف في ساعة عمري
وقت كبير
واني بحبك واني لسة بغير
وبفتح كل يوم شاتك وابص عليه
واشوف عايش بتعمل ايه
ومين بيضحكك غيري ،
ومين بعدي مسكت ايديه
واشوف عينك بتلمع ولا مطفية
وبسمع لسة أغانينا وبقول ليا
حاولت انساك ومعرفتش
وهعمل ايه ؟
” اختار لي بر وانا ارسي عليه ”
اشتقت لك
الدنيا وحشة وقاسية من غيرك
يا غايب عن عينيا بموت بدون كفك
مكنتش أبداً اتخيل
بأن اليوم يعدي عليا من دونك
مكنتش عاملة نص حساب
لغيبتك عني وشعوري
دقيقة واحدة من غيرك مبتعديش
وكل الكون بدون قلبك مبيساعنيش
بقيت مطفية وضعيفة
وبتمني الاقي ايديك
واحسك جنبي من تاني وشايفة عينيك
وكل الطبطبة بعدك مبتريحش
هترجعلي..
أمانة عليك لترجعلي في أسرع وقت
أمانة عليك تطمني وتسكن حضني وتجيني
قتلني الانتظار والخوف وكل مابينا وحنيني
بقيت ببكي.. كأني عاجزة وكأنك سند قلبي وعكازي
مليش غيرك.. وفين اراضيك
ومين يراضيني من غيرك وانا عايشة عشان اراضيك
تعبت من الوجع والحزن
ومن الخوف اللي كتفني
تعبت ومش بأيدي اخف
تعبت وقلبي من غيرك
حزين بيجف
تعبت ونفسي اطمن
ونفسي ألاقيك
ومين يراضيني من غيرك
وانا عايشة عشان اراضيك
