كلمات قصيدة هكذا قال الشيطان عمرو حسن

كلمات قصيدة هكذا قال الشيطان عمرو حسن

كان نام ليلتها وام كلثوم لم تنم
” جددت حبك ليه بعد الفؤاد ما ارتاح ده الهجر وانت قريب .. قريب مني كان فيه أمل لوصالك يوم،
لكن بعادك ده عني خلى الفؤاد منك محروم “
كان النهار واسع كإنه حضنها
لون السما يشبه لقمصان المدارس
وكنا مارس
لا الشمس حامية ولا المسا بارد
فلا الصواب محتمل ولا الخطأ وارد
كان كل شيء مختلف
كان الشيطان معترف بكل شيء عمله
وكان صباح الخير
خرج الشيطان من بيته للشارع
وكإن جسمه بُن م الفاتح
كان الكافيه فاتح
والبشر قافلين
وهي قاعدة وهما مش قاعدين
اخر لقا بينهم قتلها وقتلته
كان حبها ف غيابها كانت نسيته
فضل سنة يشربها بإرادته
وبدون إرادته كان بينسى قهوته
ضحك الشيطان بالتالي للجرسون
ولم ورقه من على الطاولة
وقال لنفسه :
” بعدين معاك طيب ، ماخلصنا م السيرة ، هنعيد لامتى ياعم ،

ماتخلي عندك دم وكُن شيطان محترم ،

هتعيش وحيد بينهم وهما بيك زايدين ! ،

ازاي هتقدر تعجب التانيين ،

هما الملايكه الغلابة وحفنة المساكين ،

وانت الشيطان الرجيم المجرم الخاين ،

هما الزباين هنا وانت اللي مش باين ،

سيرتك جناين بترويها النميمة عليك ،

وانت اللي طيب زي قاتل تاب ،

خرج الشيطان وقتها ثم رد الباب ،

بدأوا الزباين نمّ تاني عليه ، ثم استعاذوا بالإله منه “

الوقت جرّاح له تاريخ مضمون
يوسف نسي لاخواته مايضمرون
رغم انهم ألقوه في بير قاصدين
( وجاءوا أباهم عشاءً يبكون )
الوقت أكتر حرفة م التبرير
ماتقولش انك كنت كما يوسف
يكفي انهم أنكروا يوم ما اترميت ف البير
كفاية نظرة عنيهم مكسوفين منك
بيحدفوك بالطوب ف مواسم الجمرات
وانت اللي نخلك زمان رطبلهم تمرات
وانت البسيط المُحاط بدواير الكركبة
( اذ قال يوسف لأبيه يا أبت اني رأيت أحد عشر كوكبا )
قالك أبوك ماتقولش حلمك حكيت
وكتمت دمعك م الجميع وبقيت
شلال بكا نازل لجوه شديد
لو شافوا قلبك يلمحوا التجاعيد
وان شافوا عينك يفهموا ليه بكيت
مر الشيطان بالليل والدنيا مش هي
كان قتيل قاتل
و كان وتر ف القانون ضل عن أهله
كلٌ مسيّر للي يستاهله
مر ف شوارع تشبهه جداً
شايل ف ضهره ذكريات فاتت
شايل مشاعر حبها وماتت
زي البلاستيك لما يصبح ورد
اللون مزهزه بس روحه فشنك
مر الشيطان الوحيد ثم قال بهدوء :
طوبى لكل وحيد بيصاحب الدنيا
طوبى لكل الصامتين جداً
كل اللي ضحكوا من وريد مقطوع
طوبى لكل فتاة خانها اختيار الحياة
لكل صاحب حكاية عمره ما حكاها
طوبى لنفوس فيه ذكرى جواها
وتبان بتضحك ف الصور بالكدب
طوبى لكل شيطان لم يؤذي غير نفسه
والله يسامح ملايكة ما أذوش سوا الشياطين
ازاي بحبِك كده
وازاي رأيتك أمي ف دنيا ما اعرفهاش
حضنك سرير وانا طفل وقت النوم
ريحتك مطر على أرض صيف بايرة
الدايرة لما تضمني انتي
والبحر لما يردني انتي
وانتي الحاجات الصح ف دنيا غلطاتي
انتي الحياة اللي داخله بُحب ف حياتي
أنا الشيطان اسف
على اني ما عرفتش ابقى كما شئتي
انا شخص صالح ماشي بخطيئتي
باكتب اغاني يرددوها الناس
شاعر صبح شارع
سكنوه بشر تانيين
واد ابن نكتة ومغنى بس قلبه حزين
وشيطان ف قلبه امين
وف ضحكته شكراً
مر الشيطان والليل
اوشك يكونله نهار
رايح لبيته والصحاب ناموا
رايح يواصل باقي أحلامه
ويقول ياليل بكره تكون أجمل
بكره تكون أنبل
بكره البشر تحضنك حضن بصراحة وقرب
وبكره تمشي بدون ماتخاف وجود الغُرب
وبكره ممكن افوق القاكي ف نهاري
والقاني طير اتكسر وطلعله بيكي جناح
كان الشيطان بينام
وام كلثوم لم تنم
” جددت حبك ليه بعد الفؤاد ما ارتاح “