مش كل ” بُعد” بيقتل الأحلام
ولا كل بُعد في بعد منه رجوع
في فرقة بتقوي القلوب على بعض
وفرقة لسة حزنها مسموع
في فرقة قادرة تخرجك كسبان
وفرقه قادرة تخرجك بمفيش
في توهه ممكن بعد منها تعيش
وتوهه عارفة تتوهك ف تموت
في فالمتاهه صوت هيوصلك
فهتجري ناحية أملك الغلطان
وتلاقي نور الشمعة بيقرب
هتشوفه عوضك والنجاه ” والبر ”
هتلاقي خيط الخوف بقا بيتكر
هتروح بلهفة تقوله انجدني
فتحس انه خير جميل مش شر
تمسك ف ايده وكتفه هيقويك
هيقولك امشي ورايا وهنجيك
سلمت روحك وانت مطمن
لكن في نص السكة موت فيك
وتعود لخط الصفر من تاني
نفس المتاهه ونفس أحزانها
لكن ف قلبك جرح بيعاني
جرحك برغم البُعد متغطاش
ومفيش في عز التوهه قطن وشاش
خد من قميصك ما تبقي وروح
وإياك تروح تنسي الجروح بجروح
جرحك هيفضل بالشكل دة مفتوح
خد من قميصك حتة متلمستش
وابعد عشان يا روح ما بعدك روح
وإياك تغطي الجرح بأي حضن قديم
خد هدنة واسعة من البشر كلهم
الغدر اقسي من البعاد والليل
والضلمة احسن من شموع الغير
مش كل شخص ملامحه هتطمنك
يبقي اللي جوا ف قلبه حب وخير
في ناس كتير تظهِرلك الإخلاص
لكن تعيش علشان تسيب وتخون
دايرة حياتنا فيها كام موسي!
لكن تقرب تلقي ميت فرعون
أبعد عشان الحلم هيكفيك
في حلم واقف من زمان… يناديك
أبعد عشان في مطرة بتقرب
في ورود كتير هتعيش وتطرح فيك
في نجاح هييجي لو بعدت وقومت
خليك لوحدك بعد كل فراق
وأدي خبرة بعد سنين شقا وعلام
الفرقة كاس داير علي المخاليق
لكن الفرقة مش بتموت الأحلام
