شيخ العرب يوم نداني
وصاني أجمل وصية
خليتها حلقة في وداني
تنفعني في الدنيا ديا
جالي أخوك لن يخونك
ده نفس دمك ولونك
قول آخ تلقاه في عونك
بيقول ياريت تيجي فيا..
بالليل لمح رمشي ساهر
قال إيه رماك ع السهارى
جرحي نقح قال يا ساتر
إيه تاني خلف الستارة
شايل في قلبي كوارث
وارث نصيب الحيارى
قلبي لا عايش لا حاسس
مقطوعة عنه الحرارة
ميلت ساعة عصاري
سلم وميل عليا
لمحت عينيه نهر جاري
من سيل دموعي في عنيا
قالي اللي سابك تسيبه
والقلب هو ونصيبه
إقبل زمانك بعيبه
بخته اللي فهم القضية
الدنيا كيف الصبية البنية
اللي بتكبر وتحلى
هتزيد ف عندك تعاندك
ترخص لها هي تغلا
ارمي الفلوس تحت رجلك
ما تشلشي مالك في حجرك
وطول مهو مش فارجلك
هيزيد مقامك وتعلا
فيه ناس معادن يا ولدي
وناس ولا تساوي معدن
وفيه معادن تصدي
ودي اللي قلتها أحسن
المرجلة بالمواقف
مين اللي في الجد واجف
بحر الصحاب نبعه جافف
والندل عينه قوية
